- కాళోజి
అతిథివోలె వుండి వుండి
అవని విడిచి వెళ్ళుతాను
పల్లె పట్టణంబులనక
పల్లేరై తిరిగినాను
మురికి నీటి నడుమవున్న
ఇరుకులలో ఇరికినాను
కూటిపేద తన కబళము
నోటకీయ గుడిచినాను
పూలవాసనలు నిండిన
పాలరాతి మేడలలో
ఆయాసము కలిగించెడి
పాయసాలు మెక్కినాను
వాయువుతో పోటీపడు
వాహనాలు ఎక్కినాను
కంటకాల మధ్యనేను
కాలినడక నడిచినాను
కాలు బైట పెట్టకుండ
కాలమెంతో గడిపినాను
గుట్టలపై ఎక్కి ఎక్కి
గట్టుల దిగజారినాను
లోయలలో దూకిదూకి
లోతులెన్నో చూసినాను
నేపాకని ఎత్తులేదు
నేజారని లోతులేదు
మూలజేరి మునులవోలె
మూగనోము బట్టినాను
ఈగవోలె దోమవోలె
వాగుచు తిరుగాడినాను
అతిథివోలె వుండి వుండి
అవని విడిచి వెళ్ళుతాను
అద్భుతం. సాదాసీదా పదాలలో ఎంతో శక్తి ఉంది.